تىجارەتنى كىچىك ئىشلاردىن باشلاڭ

     

  بىز دۇنياۋى شۆھرەت قازانغان بايلارنىڭ كەچۈرمىشلىرىگە قارىساق، ئۇلارنىڭ كۆپ قىسمىنىڭ تىجارەتنى كىشىلەر كۆزگە ئىلمايدىغان، كۆپ مەبلەغ تەلەپ قىلمايدىغان ئۇششاق – چۈششەك ئىشلاردىن باشلىغانلىقىنى ھېس قىلىپ قالىمىز. ئامېرىكا نېفىت ماگناتى روكفېللىرنى تىلغا ئالساق، ئۇ ئاپتوموبىل ئەمدىلا دۇنياغا كەلگەن چاغدائىشنى، ئالدى بىلەن، ئىشتىن توختاپ قالغان بىر نېفىت چەككىلەش زاۋۇتىنى ھۆددىگە ئېلىشتىن باشلىغانىدى. ئاپتوموبىلنىڭ ئومۇملىشىشىغا ئەگىشىپ، ئۇنىڭ ئىشلىرى بارغانسېرى روناق تاپقان. ئۇ ھەر خىل ئاماللارنى قىلىپ، تىجارەت دائىرىسىنى تەدرىجىي كېڭەيتىپ، ئامېرىكىدىكى نېفىت ماگناتىغا ئايلانغان.
  پۇل تېپىش ياكى ئىقتىسادىي جەھەتتە قەد كۆتۈرۈش پۇرسىتى ھەممىلا يەردە مەۋجۇت، پۇرسەتنى تۇتۇشقا ماھىر كىشىلەرلا پايدىسىز ۋەزىيەتنى پايدىلىق ئامىلغا ئايلاندۇرۇپ، ئالتۇن قىرغاققا قاراپ ئىلگىرىلىيەلەيدۇ. چوڭ ئىشلارنى قىلىشقا ماجالى يەتمەيدىغان، كىچىك ئىشلارنى قىلىشنى ياراتمايدىغانلار ئۆزىنى راۋاج تاپقۇزۇشتىكى بارلىق پۇرسەتتىن ۋاز كەچكۈچىلەر بولۇپ قالىدۇ. تىجارەتنى كىچىك ئىشلاردىن باشلىغاندا، ھەر خىل تاسادىپىي ئەھۋاللارغا نىسبەتەن قارار قىلىش ئىقتىدارىنى تەدرىجىي يېتىلدۈرگىلى بولىدۇ. ئەتراپتىكى بازار ئەھۋالى ھەم كىشىلەرنىڭ ئېھتىياجىنى چىقىش قىلغۇچىلار ئۆزىنىڭ ئەمەلىي ئەھۋالىغا قاراپ، ئەتراپلىق تەييارلىق كۆرۈپ پۇختا ئىش قىلسا، چوقۇم ئىگىلىكىنى بارا – بارا روناق تاپقۇزۇپ، باي بولۇش يولىغا قەدەم قويالايدۇ.
  تىجارەتنى كىچىك ئىشلاردىن باشلىغاندا، تەدرىجىي تەجرىبە توپلاپ، قولىغا كۆپرەك پۇل كىرگەندە تىجارەت دائىرسىنى كېڭەيتىش مەقسىتىگە يەتكىلى بولىدۇ. بىراقلا چوڭ ئىش تەۋرەتمەكچى بولغانلار مەبلەغنىڭ چەكلىمىسىگە ئۇچرايدۇ. ئۇلار ئىگىلىك تىكلەشكە لازىملىق مەبلەغ مەسىلىسىنى ھەل قىلغان تەقدىردىمۇ، تىجارەتتە ئازراق پېشكەللىككە يولۇقسىلا، بىھۇدە زىيان تارتىشتىن ساقلىنالمايدۇ. شۇڭا ھەر قانداق ئىگىلىك تىكلىگۈچى ئۆزىنىڭ ئىقتىسادىي ئەمەلىي ئەھۋالىنى چىقىش قىلىپ، ئىشنى كىچىك ئىشلاردىن باشلاپ، تەدرىجىي ئىلگىرىلەپ، كاپىتال كۈچىنىڭ ئېشىشىغا ئەگىشىپ، تىجارەت دائىرىسىنى مۇۋاپىق كېڭەيتىشى لازىم.


مەنبەسى: شىنجاڭ گېزىتى

كىيىنكىسى:كەلگۈسىدە پۇل تاپقىلى بولىدىغان يەتتە ساھە

ئىككىلىك كودنى ئۈندىدارىڭىز بىلەن سىكانىرلاش ئارقىلىق يۇقارقى مەزمۇننى ھەمبەھىرلىيەلەيسىز

تىزىملىككە قايتىش